KYIV, Sept 3 (Reuters) – កាលពីថ្ងៃអង្គារ យ៉ាងហោចណាស់មនុស្ស ៥០នាក់បានស្លាប់ និង ២៧១នាក់ ផ្សេងទៀតបានរងរបួស នៅក្នុងការវាយប្រហារ ដោយមីស៊ីលផ្លោង០២ របស់រុស្សីទៅលើវិទ្យាស្ថានយោធា មួយនៅក្នុងទីក្រុង Poltava ភាគកណ្តាលរបស់ប្រទេសអ៊ុយក្រែនដោយ ដែលជាការវាយប្រហារតែ០១លើក ដែលមានអ្នកស្លាប់ច្រើនបំផុតនៃសង្រ្គាមក្នុងឆ្នាំនេះ។
រូបថតដែលបានបង្ហោះ នៅលើប្រព័ន្ធផ្សព្វផ្សាយសង្គម បានបង្ហាញពី សាកសពយុវជនជាច្រើននាក់នៅលើដី ដែលគ្របដណ្តប់ដោយធូលី និងកំទេចកំទី ជាមួយនឹងផ្នែកដែលរងការខូចខាតយ៉ាងធ្ងន់ធ្ងរនៃអគារដ៏ធំ០១នៅពីក្រោយ ។ ប៉ុន្តែសារព័ត៌មានរ៉យទ័រមិនអាចផ្ទៀងផ្ទាត់រូបភាពទាំងនោះបានភ្លាមៗទេ។
លោកប្រធានាធិបតីលោក Volodymyr Zelenskiy បាននិយាយនៅលើកម្មវីធីទំនាក់ទំនងតេលេក្រាមថា “រុស្ស៊ីនឹងទទួលខុសត្រូវចំពោះការវាយប្រហារនេះ” ។
លោកបានបញ្ជាឲ្យមានការស៊ើបអង្កេតភ្លាមៗ ដោយនិយាយថា ការវាយប្រហារបានបំផ្លាញអគារវិទ្យាស្ថានទំនាក់ទំនងយោធា។
នៅក្នុងវីដេអូសម្ភាសន៍ ពេលយប់របស់លោក ដែលត្រូវបានចែកចាយនៅពេលល្ងាច លោកZelenskiy បានកំណត់ អ្នកស្លាប់ចំនួន ៥១នាក់។
លោកបានថ្លែងថា “យើងដឹងថា មានមនុស្សនៅក្រោមគំនរអគារ ដែលត្រូវបានបំផ្លាញ។ ហើយយើងកំពុងតែធ្វើអ្វីទាំងអស់ ដើម្បីសង្គ្រោះជីវិតឱ្យបានច្រើនតាម ដែលអាចធ្វើទៅបាន” ៕
