CAIRO, Nov 3 (Reuters) – កាលពីថ្ងៃអាទិត្យ ក្រុមគ្រូពេទ្យប៉ាឡេស្ទីនបាននិយាយថា ការវាយប្រហារតាមអាកាសរបស់អ៊ីស្រាអែលបានសម្លាប់មនុស្សយ៉ាងហោចណាស់ ៣១នាក់នៅតំបន់ហ្គាហ្សាស្ទ្រីប ដោយជិតពាក់កណ្តាលនៃអ្នកស្លាប់នោះនៅតំបន់ភាគខាងជើង ដែលកងទ័ពបានធ្វើយុទ្ធនាការរយៈពេលមួយខែក្នុងគោលបំណងរារាំងក្រុមហាម៉ាសពីការប្រមូលផ្តុំឡើងវិញ។
ប្រជាជនប៉ាឡេស្ទីនបាននិយាយថា ការវាយលុកជាថ្មីតាមអាកាស និងដី និងការជម្លៀសដោយបង្ខំ គឺជា “ការបោសសម្អាតជនជាតិភាគតិច” ក្នុងគោលបំណងលុបបំបាត់ទីប្រជុំជនចំនួន០២ ក្នុងតំបន់ហ្គាហ្សាភាគខាងជើង និងជំរុំជនភៀសខ្លួនរបស់ពួកគេ ដើម្បីបង្កើតតំបន់ការពារ។ ខណៈអ៊ីស្រាអែលបានបដិសេធចំពោះការលើកឡើងនេះ ដោយនិយាយថាខ្លួនកំពុងប្រយុទ្ធនឹងក្រុមសកម្មប្រយុទ្ធហាម៉ាស ដែលបើកការវាយប្រហារពីទីនោះ។
ពេទ្យបាននិយាយថាយ៉ាងហោចណាស់ជនជាតិប៉ាឡេស្ទីន ១៣នាក់ត្រូវបានសម្លាប់នៅក្នុងការវាយប្រហារដាច់ដោយឡែកពីគ្នាទៅលើលំនៅដ្ឋានក្នុងទីប្រជុំជន Beit Lahiya និង Jabalia ដែលជាជំរុំប្រវត្តិសាស្ត្រដ៏ធំបំផុតក្នុងចំណោម ០៨ និងជាគោលដៅនៃការវាយលុកថ្មីរបស់កងទ័ព។
ចំនួនដែលនៅសេសសល់ត្រូវបានសម្លាប់នៅក្នុងការវាយប្រហារតាមអាកាសដាច់ដោយឡែកពីគ្នារបស់អ៊ីស្រាអែលនៅទីក្រុងតំបន់ហ្គាហ្សា និងនៅតំបន់ភាគខាងត្បូង មានការវាយប្រហារ ០១នៅទីក្រុង Khan Younis ហើយមន្ត្រីសុខាភិបាលបាននិយាយថា បានសម្លាប់មនុស្ស ០៨នាក់ក្នុងនោះមានកុមារ ០៤នាក់។
