កំពង់ធំ៖ បន្ទាប់ពិធីប្រកាសផ្ទេរភារកិច្ច តែងតាំង មុខតំណែង ស្នងការ នៃស្នងការដ្ឋាននគរបាលខេត្តកំពង់ធំ លោកឧត្តមសេនីយ៍ត្រី ហេង សុផល ស្នងការនគរបាល បានជួបសំណេះសំណាលជាមួយថ្នាក់ដឹកនាំ និងមន្ត្រីនគរបាលជាតិ នារសៀលថ្ងៃទី០២ ខែសីហា ឆ្នាំ២០២៤ ។
លោកឧត្តមសេនីយ៍ត្រី ហេង សុផល ស្នងការនគរបាលខេត្ត បានថ្លែងថា ថ្ងៃនេះលោកមានក្ដីសោមនស្សរីករាយយ៉ាងក្រៃលែង ដោយបានជួបផ្ទាល់ ដើម្បីសាកសួរសុខទុក្ខ សុខុមាលភាព ការអនុវត្តតួនាទី ភារកិច្ច របស់បងប្អូនកងកម្លាំងតាមបណ្តាការិយាល័យជំនាញ និងអធិការដ្ឋាននគរបាលក្រុង-ស្រុកនាឱកាសនេះ។
លោកឧត្តមសេនីយ៍ ស្នងការ បានថ្លែងអំណរអរគុណ ដល់ថ្នាក់ដឹកនាំ និងរៀមច្បងស្នងការមុនៗ ដែលបានបន្សល់ទុកនូវសមិទ្ធផល ស្នាដៃជាច្រើនសម្រាប់អង្គភាព ស្នងការដ្ឋានរបស់យើង ហើយសមិទ្ធផលនេះដែរ គឺកើតឡើងពីកត្តាសាមគ្គីភាព ឯកភាពផ្ទៃក្នុងបានល្អ ការខិតខំប្រឹងប្រែងរបស់ថ្នាក់ដឹកនាំ និងបងប្អូនកម្លាំងទាំងអស់ សមិទ្ធផល និងស្នាដៃវិសេសវិសាលខាងលើនេះកើតចេញពីសាមគ្គីភាពផ្ទៃក្នុង របស់បងប្អូនរួមគ្នាជាធ្លុំមួយមាន ឆន្ទ: មុះមុត ធ្វើការងារ មានភាពស្មោះត្រង់ទៅវិញទៅមក នឹងមានការទទួលខុសត្រូវខ្ពស់លើការងារដែលថ្នាក់ដឹកនាំប្រគល់ជូនទើបឈានទៅសម្រេចបានលទ្ធផលជាបន្តបន្ទាប់ ។
សូមបន្តថែរក្សាវប្បធម៌សាមគ្គីភាព ដើម្បីកសាងនូវសមិទ្ធផលថ្មីៗ បន្ថែមទៀតជូនរាជរដ្ឋាភិបាល ក្រសួងមហាផ្ទៃ អគ្គស្នងការដ្ឋាននគរបាលជាតិ និងស្នងការដ្ឋាននគរបាលខេត្តកំពង់ធំ របស់យើង។
លោកសង្ឃឹមថាថ្នាក់ដឹកនាំ និងបងប្អូនកងកម្លាំងយើងទាំងអស់ចូលរួមពិភាក្សាផ្លាស់ប្តូយោបល់ ចែករំលែកបទពិសោធន៍ ការងារល្អៗ ជូនគ្នាទៅវិញទៅមកដើម្បីបន្តនិរន្តរភាព ក្នុងការថែរក្សា សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជូនប្រជាពលរដ្ឋ និងរួមគ្នាដោះស្រាយបញ្ហាអសកម្មនានាក្នុងអង្គភាព ដើម្បីឈានទៅសម្រេចបាននូវភាពជោគជ័យ បន្ថែមទៀត តាមផែនការយុទ្ធសាស្ត្រ ដែលបានកំណត់ និងយន្តការ កំណែទម្រង់របស់ក្រសួងមហាផ្ទៃ រាជរដ្ឋាភិបាលនីតិកាលទី៧ ។
ឆ្លៀតក្នុងឱកាសនោះដែរ លោកឧត្តមសេនីយ៍ ស្នងការ បានផ្ដាំផ្ញើ ដល់អស់លោក លោកស្រី មន្ត្រីនគរបាលគ្រប់រូប បើមានក្ដីកង្វល់ បញ្ហាប្រឈម សូមបងប្អូន ទំនាក់ទំនង រាយការណ៍ មកថ្នាក់ដឹកនាំ អង្គភាព ដើម្បីប្រធានអង្គភាព មានមូលដ្ឋានដោះស្រាយ ជូនបងប្អូនបានទាន់ពេលវេលា និងមានប្រសិទ្ធភាពខ្ពស់។
ជាចុងក្រោយ លោកស្នងការ បានប្រសិទ្ធពរជ័យ ដល់កងកម្លាំង សូមសមប្រកបជួបប្រទះ តែពុទ្ធពរជ័យទាំងបួនប្រការគឺ អាយុ វណ្ណៈ សុខៈ ពលៈ និងសម្រេចបានជោគជ័យគ្រប់ភារកិច្ច ដែលថ្នាក់ដឹកនាំប្រគល់ជូន៕
