មណ្ឌលគិរី៖ នាព្រឹកថ្ងៃព្រហស្បតិ៍ ៧កើត ខែជេស្ឋ ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី១៣ ខែមិថុនា ឆ្នាំ២០២៤ ស្នងការដ្ឋាននគរបាលខេត្តមណ្ឌលគិរី បានរៀបចំពិធីបើកវគ្គបណ្ដុះបណ្ដាល ស្ដីពីតួនាទីនិងបទវិន័យនគរបាលជាតិកម្ពុជា ជូនដល់មន្ត្រីនគរបាលដែលជាសិក្ខាកាមមកពីបណ្តាការិយាល័យជំនាញ អធិការដ្ឋាននគរបាលក្រុង ស្រុក និងប៉ុស្តិ៍រដ្ឋបាលសរុបទាំងអស់ ចំនួន ១៦០នាក់ ។ ចំនួន ២ថ្ងៃ ចាប់ពីទី១៣ ដល់ថ្ងៃទី ១៤ ទើបបិទបញ្ចប់វគ្គបណ្ដុះបណ្ដាល លោកគ្រូបង្គោល ចំនួន ៣ រូបមកបង្រៀន ៖
ទី១ ,លោក ឧត្តមសេនីយ៍ត្រី សៅ សាវ៉ាត់ ស្នងការរងផែនសេនាធិការ ។ ទី២ ,លោក ហង្ស ម៉ានី នាយការិយាល័យកិច្ចការប៉ុស្តិ៍ ទី៣ ,លោក វិន ស៊ាងលីម នាយការិយាល័យអន្តរាគមន៍និងតម្រួតបទបញ្ជា ស្ថិតក្នុងឱកាសនោះផងដែរ លោក ឧត្តមសេនីយ៍ទោ ឡោ សុខា ស្នងការនគរបាលខេត្ត បានមានប្រសាសន៍ណែនាំដល់សិក្ខាកាមទាំងអស់ឱ្យយកចិត្តទុកដាក់ស្តាប់ការពន្យល់ណែនាំរបស់គ្រូបង្គោលក្នុងមេរៀននិមួយៗ និងគោរពវិន័យឲ្យបានខ្ជាប់ខ្ជួននៅក្នុងវគ្គបណ្ដុះបណ្ដាលនេះ។
មិនតែបណ្ណោះទេលោក ឧត្តមសេនីយ៍ទោ ស្នងការក៏បានមានប្រសាសន៍ផ្ដាំផ្ញើដល់គ្រូបង្គោលត្រូវយកចិត្តទុកដាក់បង្ហាត់បង្ហាញអំពីលំហាត់របៀបនិងតួនាទីភារកិច្ច និងក្រមសីលធម៌វិជ្ជាជីវៈរបស់កងកម្លាំងនគរបាលជាតិ ដើម្បីឱ្យសិក្ខាកាមទាំងអស់យកចំណេះដឹងនិងបទពិសោធន៍ទាំងអស់នេះយកទៅអនុវត្តអោយចំគោលដៅភារកិច្ចនិងប្រកបទៅដោយស្មារតីទទួលខុសត្រូវនិងមានការជឿទុកចិត្តពីសហគមន៍នៅតាមមូលដ្ឋាន ៕
