ខេត្តឧត្ដរមានជ័យ ៖ ថ្ងៃទី០២ ខែមករា ឆ្នាំ២០២៥ លោកឧត្តមសេនីយ៍ទោ ខូវ លី ស្នងការនគរបាលខេត្ត ព្រមទាំងមន្រ្តីនគរបាលក្រោមឱវាទ សូមចូលរួមរំលែកទុក្ខយ៉ាងក្រៀមក្រំបំផុត ចំពោះមរណៈភាពរបស់ លោកឧត្តមសេនីយ៍ត្រី ស៊ុំ សារឿន ស្នងការរង ដែលបានទទួលមរណៈភាព ដោយជំងឺគាំងបេះដូង នៅវេលាម៉ោង ១៧:៣០នាទី ថ្ងៃទី០២ ខែមករា ឆ្នាំ២០២៥ ក្នុងជន្មាយុ ៥៧ឆ្នាំ ។
ចំពោះសព លោក ឧត្តមសេនីយ៍ត្រី ស៊ុំ សារឿន ត្រូវបានតម្កល់នៅគេហដ្ឋាននៃសព ស្ថិតនៅភូមិអូរជញ្ជៀន ឃុំអន្លង់វែង ស្រុកអន្លង់វែង ដើម្បីរៀបចំពិធីបុណ្យទៅតាមប្រពៃណី ទំនៀម ទម្លាប់នៃព្រះពុទ្ធសាសនា ។
មរណភាពរបស់ លោកឧត្តមសេនីយ៍ត្រី ស៊ុំ សារឿន គឺជាការបាត់បង់នូវកូន បង ប្អូន ស្វាមី និង ឪពុកជាទីស្រលាញ់ ប្រកបដោយព្រហ្មវិហារធម៌ និងការបាត់បង់នូវនាយនគរបាលជាតិដ៏ឆ្នើមមួយរូប ដែល ធ្លាប់មានស្នាដៃ និងគុណបំណាច់ក្នុងការចូលរួមការពាររក្សាសន្តិសុខ សណ្តាប់ធ្នាប់សាធារណៈ និងសុវត្ថិ ភាពជូនសង្គមជាតិ ។
ក្នុងឱកាសដ៏សែនក្រៀមក្រំនេះ តាងនាមថ្នាក់ដឹកនាំ នាយ,នាយនគរបាលរង មន្ត្រីនគរបាលជាតិ នៃស្នងការដ្ឋាននគរបាលខេត្តឧត្តរមានជ័យ សូមចូលរួមសម្តែងនូវក្តីសោកស្តាយ អាឡោះអាល័យ និងចូលរួមរំលែកទុក្ខដ៏ក្រៀមក្រំ ជាមួយក្រុមគ្រួសារ ព្រមទាំងបងប្អូនកូនក្មួយញាតិមិត្ត ទាំងអស់នៃសព ដោយក្តីក្តុកក្តួលជាទីបំផុត និងសូមលំឱនកាយ ឧទ្ទិសបួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិក្នុងលោក សូមជួយពាំនាំដូងវិញ្ញាណក្ខន្ធ លោកឧត្តមសេនីយ៍ត្រី ស៊ុំ សារឿន ទៅកាន់សុគតិភព កុំបីឃ្លៀងឃ្លាតឡើយ ។
