កំពង់ស្ពឺ៖ នៅថ្ងៃព្រហស្បតិ៍ ៤កើត ខែបុស្ស ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី២ ខែមករា ឆ្នាំ ២០២៥ ដោយអនុវត្តបទបញ្ជាដ៏ម៉ឺងម៉ាត់លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងដឹកនាំផ្ទាល់ពីលោកវរសេនីយ៍ឯក ខឹម សាម៉ុន អធិការនគរបាលស្រុកសាមគ្គីមុនីជ័យបានបើកប្រតិបត្តិការស្រាវជ្រាវករណីមុខសញ្ញាគ្រឿងញៀនខុសច្បាប់នៅចំណុចភូមិប៉ាលហាល ឃុំចាន់សែនស្រុកសាមគ្គីមុន្នីជ័យ ខេត្តកំពង់ស្ពឺ។
ក្នុងប្រតិបត្តិការនោះកម្លាំងអធិការដ្ឋាននគរបាលស្រុកសាមគ្គីមុនីជ័យ បានបង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀនបាន៦នាក់៖ ១-ឈ្មោះ ម៉ៅ ពី ភេទប្រុស អាយុ២៤ឆ្នាំ ២-ឈ្មោះ ឆន ជៀប ភេទប្រុស អាយុ ២០ឆ្នាំ ទាំង២នាក់នៅភូមិស្ដុកអក ឃុំចាន់សែន ស្រុកសាមគ្គីមុនីជ័យ។ ៣-ឈ្មោះ លី សុខឈិវ ភេទប្រុស អាយុ២៨ឆ្នាំ នៅភូមិត្រពាំងកន្សែង សង្កាត់ក្សេមក្សាន្ត ក្រុងឧដុង្គម៉ែជ័យ។ ៤-ឈ្មោះ ឈិន សុគន្ធ ភេទប្រុស អាយុ ២៩ឆ្នាំ នៅភូមិបែកឃ្លោក សង្កាត់ក្សេមក្សាន្ត ក្រុងឧដុង្គម៉ែជ័យ។
៥-ឈ្មោះ រិទ្ធ គឹមហៃ ភេទប្រុស អាយុ ១៦ឆ្នាំ នៅភូមិបាត់ដឹង សង្កាត់ក្សេមក្សាន្ត ក្រុងឧដុង្គម៉ែជ័យ។
៦-ឈ្មោះ ភឹន សៀវម៉េង ភេទប្រុស អាយុ ៣៧ឆ្នាំ នៅភូមិតាំងរលាំង ឃុំមនោរម្យ ស្រុកថ្ពង។
សមត្ថកិច្ចដកហូតវត្ថុតាងរួមមានៈ ម្សៅក្រាមពណ៌សថ្លាសង្ស័យជាគ្រឿងញៀន ១៣កញ្ចប់ (៨តូច, ២មធ្យម និង ៣ធំ) ទម្ងន់ ក្រាម, ជញ្ជីងថ្លឹងគ្រឿងញៀន១ , ម៉ូតូ២គ្រឿង , ទូរស័ព្ទ៥គ្រឿង, អាវុធកែច្នៃ១ រួមនឹងឧបករណ៍ប្រើប្រាស់គ្រឿងញៀនមួយចំនួន។
ករណីខាងលើកម្លាំងជំនាញផ្នែកប្រឆាំងគ្រឿងញៀនបានកំពុងដំណើរការនីតិវិធីនិងកសាងសំណុំរឿងបញ្ជូនទៅកាន់ការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ត ចាត់ការតាមនីតិវិធីបន្ត ៕
