ខេត្តមណ្ឌលគិរី ៖ នៅព្រឹកថ្ងៃអង្គារ ៩រោច ខែមិគសិរ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៤ ខែធ្នូ ឆ្នាំ២០២៤ គណ:ប្រតិភូ នៃស្នងការដ្ឋាននគរបាលខេត្តមណ្ឌលគិរី ដឹកនាំដោយលោក ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ជាប្រធានគណ:ប្រតិភូ និងស្នងការដ្ឋាននគរបាលខេត្តក្រចេះ ជាប្រជាប្រធានគណ:ប្រតិភូដឹកនាំដោយលោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្តក្រចេះ និងប្រតិភូអមដំណើរ បានដឹកនាំគណ:ប្រតិភូអញ្ជើញចូលរួមក្នុងកិច្ចប្រជុំកិច្ចសហប្រតិបត្តិការ រក្សាសន្តិសុខ សណ្ដាប់ធ្នាប់នៅតាមខ្សែបន្ទាត់ព្រំដែន ប្រចាំឆ្នាំ២០២៤ និងលើកទិសដៅកិច្ចសហប្រតិបត្តិការ ឆ្នាំ២០២៥ រវាងស្នងការដ្ឋាននគរបាលខេត្តមណ្ឌលគិរី ព្រមទាំងស្នងការដ្ឋាននគរបាលខេត្តក្រចេះ (កម្ពុជា) ជាមួយស្នងការដ្ឋាននគរបាលខេត្តប៊ិញភឿក សាធារណរដ្ឋសង្គមនិយម(វៀតណាម)។
-ភាគីកម្ពុជា ដឹកនាំដោយលោកឧត្តមសេនីយ៍ទោ ឡោ សុខា ស្នងការនគរបាលខេត្ត ព្រមទាំងលោក លោកស្រីស្នងការរង លោកមេបញ្ជាការវរសេនាតូចនគរបាលការពារព្រំដែនគោក លេខ៦២១ លោកអធិការអធិការរង ព្រមទាំងសមាជិគប្រតិភូអមដំណើរជាច្រើនរូបទៀត។
-ភាគីវៀតណាម ដឹកនាំដោយលោក វរសេនីយ៍ឯក ប៊ួយ ស៊ុនថាំង ស្នងការនគរបាល ខេត្តប៊ិញភឿក សាធារណរដ្ឋសង្គមនិយម វៀតណាម
លោកឧត្តមសេនីយ៍ទោ ឡោ សុខា ស្នងការនគរបាលខេត្ត លោកបានលើកសំណូមពរសុំឱ្យខាងភាគីវៀតណាម ជួយសហការទប់ស្កាត់ បទល្មើសគ្រប់ប្រភេទ ជាពិសេសបទល្មើសឆ្លងដែនចេញចូលខុសច្បាប់គ្រប់ប្រភេទ បទល្មើសគ្រឿងញៀនគ្រប់ប្រភេទ នៅតាមខ្សែបន្ទាត់ព្រំដែនកម្ពុជា-វៀតណាម។ សុំឱ្យខាងភាគីវៀតណាមបន្តសហការគ្នាបន្ថែមទៀតបង្ការទប់ស្កាត់ការឆ្លងដែនចេញចូលដោយខុសច្បាប់ក៏ដូចជាទប់ស្កាត់ការជួញដូរមនុស្សខុសច្បាប់ និង សុំឱ្យមន្ត្រីនគរបាលជំនាញអន្តោប្រវេសន៍ នៃភាគីវៀតណាម សហការជាមួយជំនាញនគរបាលអន្តោប្រវេសន៍កម្ពុជា ដើម្បីឈានដល់ការលុបបំបាត់ជនអន្តោប្រវេសន៍ខុសច្បាប់។
ភាគីវៀតណាមក៏បានឯកភាពលើរបាយការណ៍ប្រជុំ និងបានព្រមព្រៀងសហការគ្នារួមគ្នាទប់ស្កាត់លុបបំបាត់ បទល្មើសឆ្លងដែនគ្រប់ប្រភេទជាពិសេសបទល្មើសគ្រឿងញៀនបទល្មើសឆ្លងដែនខុសច្បាប់ទៅវិញទៅមករវាងភាគីទាំងពីរ។
មុននឹងបញ្ចប់ ភាគីទាំងពីរបានឯកភាពគ្នាលើកំណត់ហេតុលើកិច្ចព្រមព្រៀងនិងបានចុះហត្ថលេខា លើកំណត់ហេតុ នៃកិច្ចប្រជុំបូកសរុបលទ្ធផលកិច្ចសហប្រតិបត្តិការបង្ការទប់ស្កាត់ បង្ក្រាបបទល្មើស និងរក្សាសន្តិសុខ សណ្ដាប់ធ្នាប់ តំបន់ព្រំដែន ប្រចាំឆ្នាំ២០២៤ និងលើកទិសដៅកិច្ចសហប្រតិបត្តិការ ឆមាសទី១ ឆ្នាំ២០២៥ ព្រមទាំងបានជូនកាដូរ អនុស្សាវរីយ៍រវាងភាគីទាំងពីរក្នុងភាពស្និទិស្នាលជាទីបំផុតរវាងភាគីនៃថ្នាក់ដឹកនាំនៃខេត្តទាំងពីរនៃប្រទេសទាំងពីរ៕
