ខេត្តកំពង់ធំ ៖ ព្រឹកថ្ងៃទី១១ ខែសីហា ឆ្នាំ២០២៤ លោកឧត្តមសេនីយ៍ត្រី ហេង សុផល ស្នងការនគរបាលខេត្ត ដឹកនាំកងកម្លាំងគោរពវិញ្ញាណក្ខន្ធ សពលោកអនុសេនីយ៍ឯក ឈួន រ៉ាឌី មន្ត្រីនគរបាល ប៉ុស្តិ៍រដ្ឋបាលចុងដូង នៃអធិដ្ឋាននគរបាលស្រុកបារាយណ៍ បានទទួលមរណភាព នាវេលាម៉ោង ១៩ និង ០០ នាទី កាលពីថ្ងៃទី ១០ខែ.ឆ្នាំ.ដដែល ក្នុងជន្មាយុ ៥៥ឆ្នាំ ដោយសាររោគាពាធ ត្រូវបានក្រុមគ្រួសាររៀបចំធ្វើបុណ្យតាមទំនៀមទំលាប់ ស្ថិតនៅគេហដ្ឋាន ក្នុងភូមិ ទួលដំណាក់ ឃុំ ចុងដូង ស្រុក បារាយណ៍ ខេត្តកំពង់ធំ ។
ថ្លែងក្នុងពិធី លោកឧត្តមសេនីយ៍ ស្នងការ បានពាំនាំប្រសាសន៍ ផ្ដាំផ្ញើ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ ឯកឧត្តម នួន ផារ័ត្ន អភិបាលខេត្តកំពង់ធំ ចូលរួមរំលែកជាមួយក្រុមគ្រួសារសព និងមានការសោកស្តាយយ៉ាងក្រៃលែងបំផុត ចំពោះការបាត់បង់មន្ត្រីនគរបាល ម្នាក់ក្នុងជួរកងកម្លាំងនគរបាលជាតិ នៃស្នងការដ្ឋាននគរបាលខេត្តកំពង់ធំ ហើយត្រូវជាមេគ្រួសារ ស្វាមី ឪពុក ជីតា ដែលអ្នកផងទាំងពួង គោរពស្រឡាញ់ ។
លោកស្នងការ បានថ្លែងទាំងក្ដីក្តុកក្តួលក្រៀមក្រំ បានលើកឡើង អំពីប្រវត្តិ ការងាររបស់លោក ឈួន រ៉ាឌី ចំពោះជាតិមាតុភូមិ នារយៈពេលកន្លងមក លោកបានគោរពគោលការណ៍ បទបញ្ជា តួនាទី ភារកិច្ចជំនាញ និងកិច្ចប្រតិបត្តិការ រក្សា សន្តិសុខ សណ្តាប់ធ្នាប់ សុវត្ថិភាពសង្គម អនុវត្តប្រកបដោយទំនួលខុសត្រូវខ្ពស់ ។
ជាងកិច្ចចុងក្រោយ លោកស្នងការ ក្នុងនាមប្រធានអង្គភាព នៃស្នងការដ្ឋាននគរបាលខេត្ត បានឧបត្ថម្ភថវិកា ២,២០០,០០០ រៀល និងប្រគល់ថវិកា ៨០០,០០០ រៀល ដែលជាការឧបត្ថម្ភ របស់ឯកឧត្តម នួន ផារ័ត្ន អភិបាល
ខេត្ត ព្រមទាំងប្រគល់ថវិកាសមាគម មិត្តនគរបាលជាតិ
កម្ពុជា ៦,០០០,០០០រៀល សរុបថវិកា ៩,០០០,០០០រៀល ។
បន្ថែមលើថវិកា លោកបានឧបត្ថម្ភ គ្រឿង ឧបភោគបរិភោគ រួមមានៈ អង្ករ.១០០ គីឡូក្រាម .ទឹកត្រី .មី.ទឹកស៊ីអ៊ីវ .ទឹកបរិសុទ្ធ .ភេសជ្ជៈ ជូនក្រុមគ្រួសារសព សម្រាប់ចូលរួមសម្រាលការចំណាយ ដោះស្រាយកម្មវិធីបុណ្យ ។
ក្នុងឱកាសនោះ លោកស្នងការនគរបាលខេត្ត ផ្ដាំផ្ញើ ដល់ក្រុមគ្រួសារសព បើជួបក្ដីកង្វល់ បញ្ហាប្រឈមដោយប្រការណាមួយ សូមរួសរាន់ទំនាក់ទំនងមក ថ្នាក់ដឹកនាំ អង្គភាព ដើម្បីប្រធានអង្គភាព មានមូលដ្ឋានជួយដោះស្រាយ បានទាន់ពេលវេលា៕
