កំពង់ស្ពឺ ៖ កាលពីថ្ងៃទី២៩ ខែវិច្ឆិកា ឆ្នាំ២០២៤ ដោយអនុវត្ដបទបញ្ជាលោកឧត្ដមសេនីយ៍ទោ ឃឹម សុកខៃ ស្នងការ នគរបាលខេត្ដកំពង់ស្ពឺ និងបានការដឹកនាំផ្ទាល់ពីលោកអធិការនគរបាលក្រុងច្បារមន កំលាំងនគរបាលបានធ្វើការស្រាវជ្រាវនិងឈានទៅកំណត់ឃាត់ខ្លួនមុខសញ្ញាបង្កហិង្សាដោយចេតនា ដែលបានកាប់ជនរងគ្រោះឈ្មោះ នី ចាន់ណា ភេទប្រុស អាយុ២៦ឆ្នាំ បណ្ដាលឲ្យដាច់ កដៃ ✊ដៃខាងឆ្វេង កាលពីថ្ងៃទី២៧ ខែវិច្ឆិកា ឆ្នាំ២០២៤ វេលាម៉ោង២៣:៥៧នាទី នៅចំណុចលើផ្លូវលេខ១០៤ មុខផ្ទះសំណាក់ជំនោររាត្រី ស្ថិតក្នុងភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។
យោងតាមបណ្ដឹងរបស់ក្រុមគ្រួសារជនរងគ្រោះ សមត្ថកិច្ចបានធ្វើការស្រាវជ្រាវ ៤៥ម៉ោង និងឈានទៅឃាត់ខ្លួនជនសង្ស័យបាន ០២នាក់ ៖
១-ឈ្មោះ អៀង ភូមិរ៉ា ហៅវ៉ាន់ ភេទប្រុស អាយុ២៥ឆ្នាំ មានទីលំនៅភូមិផ្សារសាមគ្គី សង្កាត់កណ្ដោលដុំ ក្រុងច្បារមន ខេត្តកំពង់ស្ពឺ (ជាជនដៃដល់កាប់ទៅលេីជនរងគ្រោះ)
២-ឈ្មោះ បូ កុសល ភេទប្រុស អាយុ២២ឆ្នាំ មានទីលំនៅភូមិរលាំងជ្រៃ ឃុំកាហែង ស្រុកសំរោងទង ខេត្តកំពង់ស្ពឺ នៅចំណុចខាងត្បូងផ្សាររាត្រីកំពង់ស្ពឺ យកមកធ្វើការសាកសួរនៅអធិការដ្ឋាននគរបាលក្រុងច្បារមន ជនសង្ស័យបានផ្ដល់ចម្លើយសារភាពថា
ខ្លួនបានជិះម៉ូតូ ម៉ាកស៊ុយស៊ូគីឡេត ពណ៍ខ្មៅ ពាក់ស្លាកលេខ 1V-8974 ដឹកឈ្មោះ អៀង ភូមិរ៉ា ហៅវ៉ាន់ រួចបានធ្វើសកម្មភាពយកកាំបិតផ្គាក់ដេញកាប់ជនរងគ្រោះបណ្ដាលឲ្យដាច់កដៃ ប្រាកដមែន ។
សមត្ថកិច្ចដកហូតវត្ថុតាង (1)កាំបិតផ្គាក់០១ដើម (2) ដាវ ០២ដើម (3)ម៉ូតូ០១គ្រឿង ម៉ាកស៊ុយស៊ូគីឡែត ពណ៍ខ្មៅ ផ្លាកលេខ1V-8974។
បច្ចុប្បន្នករណីខាងលើ សមត្ថកិច្ចបានបន្ដនីតិវិធី បញ្ជូនខ្លួនជនសង្ស័យ និងវត្ថុតាង កសាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តកំពង់ស្ពឺ ចំណាត់ការនីតិវិធីបន្ដ៕
