TRIPOLI, Nov 25 (Reuters) – កាលពីថ្ងៃចន្ទ ទាហានលីប៊ីបាននិយាយថា ពួកគេបានឃាត់ខ្លួនជនចំណាកស្រុកជាង ៣០០នាក់ ដែលកំពុងព្យាយាមធ្វើដំណើរឆ្លងកាត់វាលខ្សាច់ទៅកាន់ច្រាំងសមុទ្រមេឌីទែរ៉ាណេ។
រូបថតពីលើអាកាសដែលចេញផ្សាយដោយកងពលតូចលេខ ៤៤៤ ដែលជាកម្លាំងប្រតិបត្តិការក្រោមកងទ័ពលីប៊ីដែលមានមូលដ្ឋាននៅរដ្ឋធានីទ្រីប៉ូលី បានបង្ហាញពីប្រជាជនទាំងបុរស ស្ត្រី និងកុមារអង្គុយនៅលើដី ឡោមព័ទ្ធដោយទាហាន។
នៅថ្ងៃដដែល កងពលតូចបាននិយាយនៅលើទំព័រហ្វេសប៊ុករបស់ខ្លួនថា ជនចំណាកស្រុកត្រូវបានបញ្ឈប់ដោយក្រុមល្បាតតាមវាលខ្សាច់ ហើយនឹងត្រូវបាន “បញ្ជូនទៅកាន់អាជ្ញាធរមានសមត្ថកិច្ច”។ ប៉ុន្តែមិនបានបញ្ជាក់ថា តើពួកគេត្រូវបានឃាត់ខ្លួននៅពេលណានោះទេ។
ប្រទេសលីប៊ីមានសន្តិភាពរយៈពេលខ្លីចាប់តាំងពីការបះបោរ ដែលគាំទ្រដោយអង្គការណាតូកាលពីឆ្នាំ២០១១ ប្រឆាំងនឹងលោក Muammar Gaddafi ហើយប្រទេសនេះបានបំបែកជាក្រុមខាងលិចដែលមានរដ្ឋបាលទីក្រុង Tripoli និងខាងកើតដែលមានរដ្ឋបាលទីក្រុង Benghazi ដែលជាគូបដិបក្ខ។
ប្រទេសនេះបានក្លាយជាផ្លូវឆ្លងកាត់ដ៏សំខាន់សម្រាប់ជនចំណាកស្រុករាប់រយរាប់ពាន់នាក់ ដែលភៀសខ្លួនចេញពីជម្លោះ និងភាពក្រីក្រដែលកើតមាននៅទូទាំងទ្វីបអាហ្រ្វិក ផ្នែកខ្លះនៃមជ្ឈិមបូព៌ា និងតំបន់ផ្សេងទៀត ដោយសង្ឃឹមថានឹងឆ្លងកាត់សមុទ្រមេឌីទែរ៉ាណេទៅអឺរ៉ុប។
