ពោធិ៍សាត់៖ ជនសង្ស័យចំនួន១នាក់ ត្រូវបានកម្លាំងសមត្ថកិច្ចស្រុកបាកានឃាត់ខ្លួនក្នុងករណីលួចម៉ូតូ១គ្រឿង នៅវាលស្រែចំណុចអូរដោម ស្ថិតនៅភូមិអូរតាប៉ោង ឃុំអូរតាប៉ោង ស្រុកបាកាន ខេត្តពោធិ៍សាត់ កាលពីថ្ងៃទី៧ ខែវិច្ឆិកា ឆ្នាំ២០២៤ វេលាម៉ោង១៤និង៤៥នាទី។
របាយការណ៍របស់អធិការដ្ឋាននគរបាលស្រុកបាកានបានឲ្យដឹងថា កាលពីថ្ងៃទី៧ ខែវិច្ឆិកា ឆ្នាំ២០២៤ វេលាម៉ោង១៤និង៤៥នាទី មានករណីចោរលួចម៉ូតូ១គ្រឿង ម៉ាកឌ្រីមC125 ពណ៌ខ្មៅ ស៊េរី 2013 ពាក់ស្លាកលេខពោធិ៍សាត់1D-4973 ដែលម្ចាស់ឈ្មោះ ជា ជឿម ភេទប្រុស អាយុ៤៤ឆ្នាំ មានទីលំនៅភូមិអូរតាប៉ោង ឃុំអូរតាប៉ោងស្រុកបាកាន បានជិះទៅផ្លាស់គោ នៅវាលស្រែចំណុចអូរដោម ស្ថិតនៅភូមិអូរតាប៉ោង ឃុំអូរតាប៉ោង ហើយត្រូវបានចោរលួចកាច់សោរ ជិះមកទិសខាងកើត ហើយប្រជាពលរដ្ឋនៅក្បែរនោះឃើញទាន់ ស្រែកឆោឡោ ម្ចាស់ម៉ូតូ និងសមត្ថកិច្ចបានជិះម៉ូតូដេញតាមពីក្រោយ ដោយសហកាជាមួយកម្លាំងនគរបាលប៉ុស្តិ៍រដ្ឋបាលបឹងខ្នារ បានឃាត់ខ្លួនជនសង្ស័យឈ្មោះ សៅ សុភ័ណ្ឌ ហៅ អាង៉ា ភេទប្រុស អាយុ២៨ឆ្នាំ មានទីលំនៅភូមិប្រធាតុ ឃុំរបស់មង្គល ស្រុកមោងឬស្សី ខេត្តបាត់ដំបង និងដកហូតវត្ថុតាងម៉ូតូ១គ្រឿង នៅចំណុចមុខក្លឹបហាត់ប្រាណ ស្ថិតក្នុងភូមិព្រៃស្វាយ ឃុំបឹងខ្នារ រួចនាំយកមកប៉ុស្តិ៍នគរបាលរដ្ឋបាលអូរតាប៉ោង ដើម្បីសួរនាំ។
បច្ចុប្បន្នជនសង្ស័យនិងវត្ថុតាងត្រូវសមត្ថកិច្ចបញ្ជូនទៅអធិការដ្ឋាន នគរបាលស្រុកបាកាន និងបានឃាត់ខ្លួនតាមបញ្ជាឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ ដើម្បីដោះស្រាយតាមនីតិវិធី៕
