កំពង់ស្ពឺ៖ រសៀលថៃ្ងទី០១ ខែវិច្ឆិកា ឆ្នាំ២០២៤ លោកវរសេនីយ៍ឯក ហុក អេងជាង ស្នងការរង ទទួលផែនការងារធនធានមនុស្ស នៃស្នងការដ្ឋាននគរបាលខេត្ដកំពង់ស្ពឺ តំណាងលោកឧត្តមសេនីយ៍ទោ ឃឹម សុកខៃ ស្នងការនគរបាលខេត្ត បានដឹកនាំកងកម្លាំងនគរបាល ចូលរួមគោរពវិញ្ញាណក្ខន្ធសព លោកអនុសេនីយ៍ឯក យឹម វ៉ាង នាយរងប៉ុស្តិ៍នគរបាលរដ្ឋបាលត្រែងត្រយឹង នៃអធិការដ្ឋាននគរបាលស្រុកភ្នំស្រួច ដែលទទួលមរណៈភាព នៅថ្ងៃទី០១ ខែវិច្ឆិកា ឆ្នាំ២០២៤ វេលាម៉ោង ៦:៣០ នាទី ដោយរោគាពាធ សពតម្កល់ធ្វើបុណ្យតាមប្រពៃណី ស្ថិតនៅភូមិដីក្រហម ឃុំធម្មតាអរ ស្រុកភ្នំស្រួច ខេត្តកំពង់ស្ពឺ ។
នៅក្នុងឱកាសនេះ លោកវរសេនីយ៍ឯក ហុក អេងជាង តំណាងលោកស្នងការបានអញ្ជេីញធ្វេីពិធីបំពាក់ឋានន្តរសក្ដិ ថ្នាក់វរសេនីយ៍ត្រី ជាកិច្ចបច្ឆាមរណៈ និងនាំយកបច្ច័យដែលការចូលរួមរបស់មិត្ដរួមអាជីព បងប្អូនកងកម្លាំងនគរបាលនៅទូទាំងខេត្ដកកំពង់ស្ពឺសរុបចំនួន ៣.៨៨0,000 និងសម្ភារៈភេសជ្ជៈ មួយចំនួនចូលរួមក្នុងពិធីបុណ្យសពនេះផងដែរ ។
តាងនាមអង្គភាព មិត្ដរួមការងារពិតជាសោកស្ដាយ និងរំលែកទុក្ខយ៉ាងក្រៀមក្រំ នូវការបាត់បង់មន្រ្ដីនគរបាល ដែលបានលះបង់កំលាំងកាយ កំលាំងចិត្ដចូលរួមក្នុងបុព្វហេតុជាតិមាតុភូមិ សូមបួងសួងឲ្យដួងវិញ្ញាណក្ខន្ធលោក យឹម វ៉ាង បានទៅចាប់កំណេីតនៅទីសពសុខ៕
