បាត់ដំបង៖ នៅថ្ងៃទី២៩ ខែតុលា ឆ្នាំ២០២៤ វេលាម៉ោង២២និង៣០នាទី នៅចំណុចចបូរីសាច់អាំង ស្ថិតនៅក្រុមទី០៣ ភូមិសាលាបាឡាត់ សង្កាត់អូរម៉ាល ក្រុងបាត់ដំបង ខេត្តបាត់ដំបង មានករណីលួចមានស្ថានទម្ងន់ទោស (គាស់ផ្ទះលួចយកម៉ូតូ) មួយកើតឡើង ប្រព្រឹត្តដោយជនសង្ស័យមិនស្គាល់អត្តសញ្ញាណ បានធ្វេីសកម្មភាពគាស់ផ្ទះលួចយកម៉ូតូរបស់ជនរងគ្រោះឈ្មោះ ជឿង ណារិទ្ធ ភេទប្រុស អាយុ៣៤ឆ្នាំ មានទីលំនៅភូមិភ្នំសំពៅកេីត ឃុំភ្នំសំពៅ ស្រុកបាណន់ ខេត្តបាត់ដំបង ។ សម្ភារៈបាត់បង់រួមមាន៖ ម៉ូតូ០១គ្រឿងម៉ាកហុងដាឌ្រីម សេ១២៥ ពណ៍ខ្មៅ ពពាក់ស្លាកលេខភ្នំពេញ1AM-3099 ។
ក្រោយពីទទួលបណ្តឹងពីជនរងគ្រោះ អនុវត្តតាមយោបល់ដឹកនាំរបស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលនីតិវិធីពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង កំលាំងផ្នែកនគរបាលយុត្តិធម៌ រួមជាមួយប៉ុស្តិ៍នគរបាលរដ្ឋបាល នៃអធិការដ្ឋាននគរបាលក្រុងបាត់ដំបង ដឹកនាំដោយលោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានចុះធ្វើការស៊ើបអង្កេតស្រាវជ្រាវរហូតដល់ថ្ងៃ៣០ ខែតុលា ឆ្នាំ២០២៤ ចុះធ្វើការស៊ើបអង្កេតស្រាវជ្រាវ បានកំណត់អត្តសញ្ញាណឈានដល់ការនាំខ្លួនជនសង្ស័យម្នាក់ ឈ្មោះ ផល សុខមាន ភេទប្រុស អាយុ២៣ឆ្នាំ មានទីលំនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង យកមកសាកសួរនៅអធិការដ្ឋាននគរបាលក្រុងបាត់ដំបង ។
ក្រោយពីបានសាកសួរជនសង្ស័យខាងលើ បានឆ្លើយសារភាពថា កាលថ្ងៃទី២៩ ខែតុលា ឆ្នាំ២០២៤ វេលាម៉ោង២២និង០០នាទី ខ្លួនបានដេីរចេញពីផ្ទះដោយយកដែកដាប់ និងទុលឡាវីសទៅជាមួយពេលដេីរដល់ចំណុចកេីតហេតុខាងលេីខ្លួនបានឃេីញផ្ទះមួយខ្នងគ្មានមនុស្សនៅដោយឃេីញឱកាសល្អខ្លួនក៍ផ្លោះរបងចូលទៅក្នុងផ្ទះនោះហេីយខ្លួនបានយកទុលឡាវីសមួលវីសទ្វាដែកយកកញ្ចក់ចេញហេីយខ្លួនលូនចូលទៅក្នុងផ្ទះក៍បានឃេីញម៉ូតូ០១គ្រឿងនៅក្នុងផ្ទះពេលនោះខ្លួនក៍យកជេីងធាក់បំបាក់ករម៉ូតូនោះ ហេីយតខ្សែភ្លេីងម៉ូតូនោះអោយឆេះ ពេលតរួចហេីយ ខ្លួនបានយកដែកដាប់ទៅគាស់សោទ្វាក្រោយផ្ទះហេីយក៍យកម៉ូតូចេញតែម្ដង ។ វត្ថុតាងដកហូតបានរួមមាន៖
-ម៉ូតូ០១គ្រឿងម៉ាកហុងដាឌ្រីម សេ១២៥ ពណ៍ខ្មៅ ពពាក់ស្លាកលេខភ្នំពេញ1AM-3099 ជារបស់ជនរងគ្រោះ ។
ករណីនេះ ជនសង្ស័យខាងលើត្រូវបានកម្លាំងនគរបាលក្រុងបាត់ដំបងសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕
