រាជធានីភ្នំពេញ ៖ នៅព្រឹកថ្ងៃទី៦ ខែសីហា ឆ្នាំ២០២៤ ឯកឧត្តម ឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោក CHARLES K.WHITEHEAD សាស្ត្រាចារ្យផ្នែកច្បាប់ពាណិជ្ជកម្ម និងជានាយកកម្មវិធីច្បាប់បច្ចេកវិទ្យា និងសហគ្រិនភាព នៃសាលា Cornell នាទីក្រុងញូវយ៉ក សហរដ្ឋអាមេរិក បានអញ្ជើញជាអធិបតី ក្នុងពិធីធ្វើបាឋកថាចែករំលែកបទពិសោធន៍ស្តីពីលំហូរសាច់ប្រាក់ដែលបង្កឲ្យមានបទល្មើសហិរញ្ញវត្ថុ នៅទីស្តីការក្រសួងមហាផ្ទៃ។
ពិធីនេះ ក៏មានការអញ្ជើញចូលរួមពី ឯកឧត្តម តាន់ សេណារ៉ុង អគ្គព្រះរាជអាជ្ញារង នៃមហាអយ្យការអមសាលាឧទ្ធរណ៍រាជធានីភ្នំពេញ, នាយនគរបាលជាន់ខ្ពស់ចំណុះនាយកដ្ឋានកណ្តាលសន្តិសុខ និងនាយកដ្ឋានកណ្តាលនគរបាលយុត្តិធម៌ និងនាយនគរបាលជាន់ខ្ពស់ នៃក្រុមការងារ Hotline Scam 24/7 អគ្គស្នងការដ្ឋាននគរបាលជាតិ ដោយមានការសម្របសម្រួលដោយ លោកឧត្តមសេនីយ៍ត្រី ហេង បញ្ញវឌ្ឍន៍ នាយការិយាល័យទំនាក់ទំនងអន្តរជាតិ និងលោកវរសេនីយ៍ទោ ឆាយ ប៊ុនរម្យម៉ានិត នាយការិយាល័យប្រឆាំងបទល្មើសសង្គមបច្ចេកវិទ្យា៕
