ខេត្តកំពង់ធំ៖ រសៀលថ្ងៃទី០៤ ខែសីហា ឆ្នាំ២០២៤ លោកឧត្តមសេនីយ៍ត្រី ហេង សុផល ស្នងការនគរបាលខេត្ត បានត្រៀមខ្លួនរួចជាស្រេច សម្រាប់ការងារ ការពារថែរក្សា សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងឱកាសពីធីបើកការដ្ឋានសាងសង់ព្រែកជីកហ្វូណនតេជោ ។
លោកឧត្តមសេនីយ៍ត្រី ស្នងការ បានថ្លែងថា ដោយអនុវត្តតាមគោលការណ៍ ថ្នាក់ដឹកនាំ ក្រសួងមហាផ្ទៃ អគ្គស្នងការដ្ឋាននគរបាលជាតិ ឯកឧត្តមនួន ផារ័ត្ន អភិបាល នៃគណៈអភិបាលខេត្ត ស្នងការដ្ឋាននគរបាលខេត្តកំពង់ធំ ដាក់ចេញនូវផែនការសរុប កម្លាំងសរុប មធ្យោបាយសរុប សំដៅធានា ថែរក្សាបាន សន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គម សម្រាប់ជាថ្ងៃប្រវត្តិសាស្ត្រ ពិធីបើកការដ្ឋានសាងសង់ព្រែកជីកហ្វូណនតេជោ នាព្រឹកថ្ងៃទី ០៥ ខែ សីហា ឆ្នាំ២០២៤នេះ ។
លោក ស្នងការនគរបាលខេត្ត បានបញ្ជាក់ថា តាមវត្តអារាម រមនីយដ្ឋាន ទីកន្លែងសប្បាយភាព ប្រគំតន្ត្រី ត្រូវបានពង្រាយកងកម្លាំងគ្រប់មូលដ្ឋានទូទាំងខេត្ត ថែរក្សា សន្តិសុខ សណ្តាប់ធ្នាប់សាធារណៈ បង្កបរិយាកាស សុខសប្បាយរីករាយ ជូនប្រជាពលរដ្ឋ ក្នុងឱកាសចូលរួមអបអរសាទរ ពិធីបើកការដ្ឋានសាងសង់ព្រែកជីកហ្វូណនតេជោ ។
ដោយឡែកក្រៅពីការបញ្ចុះកម្លាំង តាមបណ្តាគោលដៅសំខាន់ៗ លោកឧត្តមសេនីយ៍ ហេង សុផល បានឲ្យដឹងថា នៅស្នងការដ្ឋាននគរបាលខេត្ត និងអធិការដ្ឋាននគរបាលក្រុង-ស្រុក បានត្រៀមកងកម្លាំង សម្ភារៈ មធ្យោបាយ អន្តរាគមន៍ សម្រាប់កិច្ចប្រតិបត្តិ សង្គ្រោះ ដល់ប្រជាពលរដ្ឋ នាគ្រាជួបហេតុការ ណាមួយដែលអាចកើតមានឡើងជាចៃដន្យ ផងដែរ ។
ជាចុងក្រោយលោកស្នងការ សូមចូលរួមគាំទ្រ អបអរសាទរ ចំពោះសមិទ្ធផលប្រវត្តិសាស្ត្រ សម្រាប់ប្រទេសកម្ពុជា យើងលើកដំបូង ដែលមានព្រែកជីកហ្វូណនតេជោ ក្រោមការផ្តួចផ្តើមគំនិតប្រកបដោយគិតបណ្ឌិត ដ៏ខ្ពង់ខ្ពស់របស់ប្រមុខរាជរដ្ឋាភិបាល នៃព្រះរាជាណាចក្រកម្ពុជា ដើម្បីបន្សល់ជាកេរមត៌កដល់ប្រជាជនជំនាន់ក្រោយ៕
