សៀមរាប ៖ នៅព្រឹកថ្ងៃអាទិត្យ ១៥រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី០៤ ខែសីហា ឆ្នាំ២០២៤នេះ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប អញ្ជើញអមដំណើរ ឯកឧត្តម សន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ ក្នុងកិច្ចដំណើរការប្រឡងប្រជែងជ្រើសរើស ក្របខ័ណ្ឌមន្ត្រីនគរបាលជាតិកម្ពុជា ឱ្យចូលបម្រើការងារនៅអធិការដ្ឋាននគរបាលក្រុងរុនតាឯកតេជោសែន នៃស្នងការដ្ឋាននគរបាលខេត្តសៀមរាប នៅមណ្ឌលប្រឡង វិទ្យាល័យសម្តេចឪ ដែលស្ថិតនៅភូមិថ្នល់ សង្កាត់ស្រង៉ែ ក្រុងសៀមរាប ខេត្តសៀមរាប ដែលមានបេក្ខជនចូលរួមប្រឡងប្រជែងសរុបចំនួន ២០០នាក់ ស្រី ៤៣នាក់។
ចំពោះការប្រឡងប្រជែងនេះ បេក្ខជនត្រូវបានអនុវត្ត គឺមិនត្រូវពិភាក្សាគ្នា បើកចម្លង លួចចម្លង និងឱ្យគេចម្លង,មិនត្រូវយកអាវុធជាតិផ្ទុះ ចូលក្នុងមណ្ឌលប្រឡង, មិនត្រូវយកសំណៅឯកសារពាក់ព័ន្ធផ្សេងៗ ដូចជាទូរស័ព្ទ និងសម្ភារឧបករណ៍អេឡិចត្រូនិចចូលក្នុងបន្ទប់ប្រឡង,មិនត្រូវធ្វើសញ្ញាសម្គាល់ផ្សេងៗលើសន្លឹកកិច្ចការ និងមិនត្រូវឱ្យអ្នកដ៏ទៃប្រឡងជំនួស។
រាល់ការប្រព្រឹត្តល្មើសនឹងបទប្បញ្ញាត្តិខាងលើ បេក្ខជននឹងត្រូវបានបញ្ឈប់ការប្រឡងដោយអនុគណៈកម្មការអនុរក្ស៕
