ខេត្តបាត់ដំបង ៖ នៅថ្ងៃទី១៤ ខែមករា ឆ្នាំ២០២៥ វេលាម៉ោង១១និង៣០នាទី នៅចំណុចភូមិព្រៃចែក ឃុំកំពង់ព្រះ ស្រុកសង្កែ ខេត្តបាត់ដំបង កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលស្រុកសង្កែ ដឹកនាំដោយលោកវរសេនីយ៍ទោ យុត តុងហូ អធិការនគរបាលស្រុកសង្កែ បានចុះប្រតិបត្តិការ បង្ក្រាបបានករណី ប្រេីប្រាស់ដោយខុសច្បាប់នូវសារធាតុញៀន ០១ករណី ក្នុងបទល្មើសជាក់ស្តែង ។ ក្នុងកិច្ចប្រតិបត្តិការនេះ សមត្ថកិច្ចឃាត់ខ្លួនជនសង្ស័យម្នាក់ ឈ្មោះ ញ៉ិល ស្រីពេជ្រ ភេទស្រី អាយុ១៦ឆ្នាំ រស់នៅភូមិព្រៃចែក ឃុំកំពង់ព្រះ ស្រុកសង្កែ ខេត្តបាត់ដំបង ។
ឆ្លងតាមចម្លើយសារភាពរបស់ជនសង្ស័យខាងលើ និងដោយមានការអនុញ្ញាតពីលោកឧត្តមសេនីយ៍ទោ ស្នងការនៃស្នងការដ្ឋាននគរបាលខេត្តបាត់ដំបង និងមានការសម្របសម្រួលនីតិវិធីពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង កម្លាំងអធិការដ្ឋាននគរបាលស្រុកសង្កែ សហការជាមួយកម្លាំងអធិការដ្ឋាននគរបាលក្រុងបាត់ដំបង និងស្រុកឯកភ្នំ នៅថ្ងៃខែឆ្នាំដដែល វេលាម៉ោង១២ និង០០នាទី នៅចំណុចភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង បានបន្តចុះប្រតិបត្តិការ បង្ក្រាប ឈានដល់ចាប់ឃាត់ខ្លួនជនសង្ស័យបានចំនួន ០៤នាក់ទៀត ១-ឈ្មោះ ហឿន រក្សា ភេទប្រុស អាយុ១៦ឆ្នាំ រស់នៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង, ២-ឈ្មោះ សាំង ប៉ាវ ភេទប្រុស អាយុ១៧ឆ្នាំ រស់នៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង, ៣-ឈ្មោះ ចេង ចំរេីន ភេទប្រុស អាយុ១៨ឆ្នាំ រស់នៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង និង៤-ឈ្មោះ អ៊ាន ផៃ ភេទប្រុស អាយុ៦៨ឆ្នាំ រស់នៅភូមិព្រែកស្នោ ឃុំព្រែកខ្ពប ស្រុកឯកភ្នំ ខេត្តបាត់ដំបង ។ វត្ថុតាងចាប់យកបានរួមមាន៖
-កញ្ឆាក្រៀម ចំនួន០១ថង់
-បំពង់ឫស្សីសម្រាប់ជក់កញ្ឆាចំនួន០៣
-កាបូបលុយចំនួន០២
-ទូរសព្ទ័ដៃចំនួន ០២គ្រឿង
-កញ្ឆាស្រស់ចំនួន ៥២០ដេីម
-កញ្ឆាស្ងួតចំនួន ២៣,៥គីឡូ ទាំងសំបក ។
បច្ចុប្បន្ន កម្លាំងអធិការដ្ឋាននគរបាលស្រុកសង្កែ កំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់វិធានការតាមនីតិវិធី៕
