កំពង់ចាម ៖ ថ្លែងក្នុងឱកាសអញ្ជើញជាធិបតី ក្នុងពិធីអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពលើមធ្យោបាយដឹកជញ្ជូនជូនដល់អ្នកបើកបរយានយន្តដឹកកម្មករនិយោជិត និងកម្មករនិយោជិត ស្ថិតនៅរោងចក្រ LE GROW (CAMBODIA) CO., LTD ស្ថិតនៅបណ្តោយផ្លូវជាតិលេខ៦ ស្រុកជើងព្រៃ ខេត្តកំពង់ចាម នាព្រឹកថ្ងៃទី៨ ខែសីហា ឆ្នាំ២០២៤ ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ នៃក្រសួងមហាផ្ទៃ បានបញ្ជាក់ថា ការផ្សព្វផ្សាយអំពីច្បាប់ស្តីពីចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពលើមធ្យោបាយដឹកជញ្ជូន គឺជារឿងសំខាន់ណាស់ ដែលអាចឱ្យបងប្អូនអ្នកបើកបររថយន្តដឹកកម្មករនិយោជិត និងកម្មករនិយោជិត បានយល់ដឹងកាន់តែច្បាស់ក្នុងការធ្វើដំណើរ និងការប្រើប្រាស់ដងផ្លូវ ការគោរពសិទ្ធិគ្នាក្នុងពេលធ្វើដំណើរ និងផលប៉ះពាល់នៃការប្រើប្រាស់គ្រឿងញៀនអំឡុងពេលបើកបរ ដែលទាំងអស់នេះនឹងអាចកាត់បន្ថយករណីគ្រោះថ្នាក់ចរាចរណ៍ឲ្យធ្លាក់ចុះមកនូវកម្រិតទាបបំផុត។
ពិធីនេះ មានការអញ្ជើញចូលរួមពី ឯកឧត្តមអភិបាលរងនៃគណៈអភិបាលខេត្តកំពង់ចាម ឯកឧត្តមអនុប្រធានក្រុមការងារ តំណាងបេឡាជាតិសនិ្តសុខសង្គម លោកឧត្តមសេនីយ៍ទោ និងអនុប្រធានមន្ទីរប្រឆាំងគ្រឿងញៀន ព្រមទាំងមានអ្នកចូលរួមសរុបចំនួន៦០០ នាក់ ក្នុងនោះមានអ្នកបើកបររថយន្តដឹកកម្មករចំនួន២០០នាក់៕
