កំពង់ធំ៖ នៅព្រឹកថ្ងៃទី១៣ ខែវិច្ឆិកា ឆ្នាំ២០២៤ លោកឧត្តមសេនីយ៍ត្រី ទាន ប៉េងស៊ន ស្នងការរងផែនការងារធនធានមនុស្ស តំណាងលោកឧត្តមសេនីយ៍ទោ ហេង សុផល ស្នងការនគរបាលខេត្ត ជួបសំណេះសំណាលប្រគល់ថវិកា សមាគមមិត្តនគរបាលជាតិ កម្ពុជា ជូនគ្រួសារសមាជិក ដើម្បីយកប្រើប្រាស់ ស្របតាមតម្រូវការចាំបាច់ ជាប្រចាំថ្ងៃ ។
ជាកិច្ចចាប់ផ្ដើម លោកឧត្តមសេនីយ៍ត្រី ទាន ប៉េងស៊ន បានពាំនាំប្រសាសន៍ ផ្តាំផ្ញើ របស់លោកឧត្តមសេនីយ៍ទោ ហេង សុផល ស្នងការនគរបាលខេត្ត និងជាប្រធានគណ:កម្មាធិការមូលដ្ឋាន ចូលរួមរំលែកទុក្ខ ចំពោះការបាត់បង់ ស្វាមី ឪពុក ជីតា មនុស្សជាទីស្រឡាញ់ ផ្ដល់ភាពកក់ក្ដៅ ក្នុងក្រុមគ្រួសារ របស់បងប្អូន ។
ជាមួយគ្នានោះដែរ លោកថ្លែងអំណរគុណយ៉ាងជ្រាលជ្រៅបំផុត ដែលអនុញ្ញាតឲ្យស្វាមីចូលបម្រើការងារក្នុងជួរកងកម្លាំងនគរបាលជាតិ នារយៈពេលកន្លងមក ដើម្បីបុព្វហេតុជាតិមាតុភូមិ ថែរក្សា សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម រហូតទទួលបានសន្តិភាព យ៉ាងពេញលេញ នាពេលបច្ចុប្បន្ន ។
ឆ្លៀតក្នុងឱកាសនោះដែរលោក ស្នងការរង ប្រគល់ថវិកាឧបត្ថម្ភ ចំនួន ០៣ គ្រួសារ, ក្នុង០១គ្រួសារ ទទួលបានថវិកា៦,០០០,០០០ រៀល ទឹកប្រាក់សរុប ១៨,០០០,០០០រៀល (ដប់ប្រាំបីលានរៀលគត់) ។
បន្ថែមទៅនឹងថវិកាខាងលើនេះ លោកស្នងការរង បានជំរុញដល់សមាជិក ត្រូវបង្ករបង្កើនផល ដាំដំណាំបន្លែ ចិញ្ចឹមសត្វ ដើម្បីដោះស្រាយការចំណាយក្នុងជីវភាពក្នុងក្រុមគ្រួសារនីមួយៗ ឲ្យកាន់តែប្រសើរឡើង។
ជាកិច្ចចុងក្រោយ លោកបានផ្ដាំផ្ញើ ដល់បងប្អូន បើជួបទុក្ខកង្វល់ បញ្ហាប្រឈម សូមបងប្អូន ទំនាក់ទំនងមកថ្នាក់ដឹកនាំ និងអង្គភាព ដើម្បីជួយអន្តរាគមន៍ ដោះស្រាយជូនបងប្អូន បានទាន់ពេលវេលា ៕
