រាជធានីភ្នំពេញ ៖ នៅទីស្តីការក្រសួងមហាផ្ទៃ ព្រឹកថ្ងៃទី១១ ខែវិចិ្ឆកា ឆ្នាំ២០២៤ ឯកឧត្តម ឧត្តមសេនីយ៍ឯក តាន់ សំណាង អគ្គស្នងការរងនគរបាលជាតិ ទទួលដឹកនាំការងារបុគ្គលិក និងធនធានមនុស្ស តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានអញ្ជើញជាអធិបតីភាពក្នុងកិច្ចប្រជុំ ស្តីពីការពង្រឹងការងារបុគ្គលិក សម្រាប់នាយកដ្ឋាន អង្គភាព មន្ទីរ និងស្នងការដ្ឋាននគរបាលរាជធានី-ខេត្ត ចំណុះអគ្គស្នងការដ្ឋាននគរបាលជាតិ។ កិច្ចប្រជុំនេះ មានការចូលរួមពីអនុប្រធាននាយកដ្ឋាន មន្ទីរ អង្គភាពទទួលការងារបុគ្គលិក ស្នងការរងនគរបាលរាជធានី-ខេត្តទទួលផែនការងារគ្រប់គ្រងធនធានមនុស្ស និងនាយការិយាល័យជំនាញដែលពាក់ព័ន្ធ។
បន្ទាប់ពីបានស្តាប់ខ្លឹមសារ នៃការធ្វើបទបង្ហាញអំពីបែបបទរដ្ឋបាល របស់ក្រុមការងារជំនាញរបស់ការិយាល័យបុគ្គលិក នៃអគ្គស្នងការដ្ឋាននគរបាលជាតិ និងសំណើព្រមទាំងបញ្ហាប្រឈម ដែលបានលើកឡើងដោយអនុប្រធាននាយកដ្ឋាន មន្ទីរ អង្គភាពទទួលការងារបុគ្គលិក ស្នងការរងនគរបាលរាជធានី-ខេត្ត ទទួលផែនការងារគ្រប់គ្រងធនធានមនុស្ស និងនាយការិយាល័យជំនាញ ចំណុះអគ្គស្នងការដ្ឋាននគរបាលជាតិរួចមក ឯកឧត្តម ឧត្តមសេនីយ៍ឯក តាន់ សំណាង អគ្គស្នងការរងនគរបាលជាតិ ទទួលដឹកនាំការងារបុគ្គលិក និងធនធានមនុស្ស បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដល់កងកម្លាំងនគរបាលជាតិទាំងអស់ ដែលបានឆ្លៀតពេលវេលាដ៏មានតម្លៃនិងមមាញឹកអញ្ជើញចូលរួមក្នុងកិច្ចប្រជុំនាពេលនេះ និងបានលើកឡើងពីស្នាដៃ និងកិច្ចខិតខំប្រឹងប្រែងកន្លងមក របស់អនុប្រធាននាយកដ្ឋាន មន្ទីរ អង្គភាព ស្នងការរង និងនាយការិយាល័យគ្រប់លំដាប់ថ្នាក់ដែលបានអនុវត្តសម្រេចជោគជ័យជាបន្តបន្ទាប់។
ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ បានបន្តថា ផ្អែកតាមកម្មវិធីនយោបាយនីតិកាលទី ៧ នៃរដ្ឋសភា, រាជរដ្ឋាភិបាលបានដាក់ចេញនូវយុទ្ធសាស្ត បញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដោយបន្ដផ្ដោតជាសំខាន់ទៅលើរបៀបវារៈធានា “ប្រសិទ្ធភាពសមិទ្ធកម្ម” តាមរយៈការអនុវត្តអភិក្រម គឺ“ឆ្លុះកញ្ចក់, ងូតទឹក, ដុសក្អែល, ព្យាបាល និងវះកាត់។ ឯកឧត្តមអគ្គស្នងការរងនគរបាលជាតិ បន្តថា កម្មវិធីកំណែទម្រង់នានា ថ្នាក់ដឹកនាំបានបញ្ជាក់ហើយបញ្ជាក់ទៀត ត្រូវធ្វើកំណែទម្រង់ធនធានមនុស្ស ហើយត្រូវខិតខំពង្រឹងនូវអ្វីដែលមានស្រាប់ ជាជាងការពង្រីក។ ទន្ទឹមនឹងការពង្រឹងពង្រីកនេះផងដែរ សមត្ថភាពរបស់បងប្អូន ក៏ត្រូវខិតខំអភិវឌ្ឍន៍ខ្លួនឲ្យបានសមស្របទៅតាមបរិបទសង្គមផងដែរ។
ជាមួយគ្នានោះ ឯកឧត្តមអគ្គស្នងការរង ក៏បានផ្តាំផ្ញើចំពោះ អនុប្រធាននាយកដ្ឋាន លោកស្នងការរង និងនាយការិយាល័យបុគ្គលិក ចំណុះអគ្គស្នងការដ្ឋាននគរបាលជាតិទាំងអស់ត្រូវ ៖
– លើកទឹកចិត្តដល់មន្ត្រីនគរបាលជាតិ ដែលខិតខំធ្វើការ និងគោរពវិន័យ
– ការងារដែលពាក់ព័ន្ធ ត្រូវធ្វើតាមឋានានុក្រម តាមខ្សែបណ្តោយអគ្គស្នងការដ្ឋាននគរបាលជាតិ មិនត្រូវរំលងឋានានុក្រមណាមួយឡើយ
– គោលការណ៍ស្នើសុំច្បាប់ឈប់សម្រាក ត្រូវអនុវត្តតាមប្រកាសលេខ ៦៧១៧ ប្រក ចុះថ្ងៃទី៤ ខែវិច្ឆិកា ឆ្នាំ២០២៤ ស្តីពីសិទ្ធិអនុញ្ញាតច្បាប់ឈប់គ្រប់ប្រភេទសម្រាប់មន្ត្រីនគរបាលជាតិកម្ពុជា
– ផ្សព្វផ្សាយអំពីបទវិន័យកងកម្លាំងនគរបាលជាតិ ការស្លៀកពាក់ឯកសណ្ឋានឱ្យបានត្រឹមត្រូវ
– ព្យាយាមហ្វឹកហ្វឺនដល់បុគ្គលិកនៅក្នុងអង្គភាពឱ្យចេះមានជំនាញក្នុងការបំពេញការងារឲ្យបានល្អ៕
