មណ្ឌលគិរី ៖ នៅព្រឹក ថ្ងៃពុធ ១៣រោច ខែអស្សុជ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹង ថ្ងៃទី៣០ ខែតុលា ឆ្នាំ២០២៤នេះ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានអញ្ជើញជាអធិបតីបើកកិច្ចប្រជុំដាក់ផែនការការពារ រក្សាសន្តិសុខ សណ្តាប់ធ្នាប់ និងសុវត្ថិភាពជូនលោក ជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមន៍កាយឬទ្ធិនារីកម្ពុជា ដែលអញ្ជើញជាអធិបតីដ៏ខ្ពង់ខ្ពស់ក្នុងពិធីបោះជំរំប្រចាំ ឆ្នាំ២០២៤ នៃសមាគមន៍កាយរិទ្ធិនារីកម្ពុជានៅក្រុងសែនមនោរម្យខេត្តមណ្ឌលគិរី។
ក្នុងកិច្ចប្រជុំនាពេលនោះមានការអញ្ជើញចូលរួមពីលោក លោកស្រីស្នងការរង លោកលោកស្រី នាយ នាយរងការិយាល័យជំនាញទាំងអស់ លោកមេបញ្ជាការ មេបញ្ជាការរងទទួលសេនាធិការ វរសេនាតូច ទាំង០២ លោកអធិការ អធិការរងទទួលសេនាធិការ និងអធិការរងទទួលការងារសន្តិសុខ នៃអធិការដ្ឋាននគរបាល ក្រុង/ស្រុកទាំង០៥ ដែលបានអញ្ជើញចូលរួមក្នុងកិច្ចប្រជុំនាពេលនោះផងដែរ។ ជាកិច្ចចាប់ផ្តើមបើកកិច្ចប្រជុំលោក ឧត្តមសេនីយ៍ទោ ស្នងការបានមានប្រសាសន៍បើកកិច្ចប្រជុំនិងបានដាក់ផែនការណ៍ដល់អស់លោក លោកស្រីស្នងការរង និងនាយ នាយរងការិយាល័យជំនាញព្រមទាំងលោកមេបញ្ជាការ វរសេនាតូចនគរបាលការពារព្រំដែនគោកទាំង០២ ព្រមទាំងលោកអធិការនគរបាលក្រុង/ស្រុកទាំង០៥ រៀបចំកងកម្លាំងនៅតាមបណ្តាអធិការក្រុងស្រុករបស់ខ្លួន ដើម្បីបញ្ចុះកម្លាំងទៅតាមចំណុចគោលដៅសំខាន់ៗ និងនៅតាមដងផ្លូវនិងទីកន្លែងក្នុងពិធីបោះជំរំ។ ក្នុងនោះស្នងការដ្ឋាននគរបាលខេត្ត បានប្រើប្រាស់កម្លាំងសរុប ចំនួន៦៤៦នាក់ និងប្រើប្រាស់មធ្យោបាយរថយន្តគ្រប់ប្រភេទសំរាប់ចុះ ការពារសន្តិសុខ សណ្តាប់ធ្នាប់និងសុវត្ថិភាពជូនថ្នាក់ដឹកនាំប្រកបដោយសុវត្ថិភាព៕
