MOSCOW, Oct 27 (Reuters) – កាលពីថ្ងៃអាទិត្យ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា ក្រសួងការពារជាតិរបស់រុស្ស៊ី កំពុងធ្វើការលើមធ្យោបាយផ្សេងៗ ដើម្បីឆ្លើយតប ប្រសិនបើសហរដ្ឋអាមេរិក និងសម្ព័ន្ធមិត្តណាតូ ជួយអ៊ុយក្រែនវាយលុកចូលជ្រៅទៅក្នុងប្រទេសរុស្ស៊ី ដោយប្រើប្រាស់មីស៊ីលរយៈចម្ងាយឆ្ងាយរបស់ប្រទេសលោកខាងលិច។
សង្គ្រាមអ៊ុយក្រែនដែលមានរយៈពេល ២,៥ឆ្នាំ បានបង្កឱ្យមានការប្រឈមមុខដាក់គ្នាដ៏តានតឹងបំផុតរវាងរុស្ស៊ី និងលោកខាងលិច ចាប់តាំងពីសង្រ្គាមត្រជាក់ ហើយមន្ត្រីរុស្ស៊ីបាននិយាយថា សង្រ្គាមពេលនេះកំពុងឈានចូលដល់ដំណាក់កាលដ៏គ្រោះថ្នាក់បំផុត។
រុស្ស៊ីបានផ្តល់សញ្ញាដល់សហរដ្ឋអាមេរិក និងសម្ព័ន្ធមិត្តជាច្រើនសប្តាហ៍ថា ប្រសិនបើពួកគេផ្តល់ការអនុញ្ញាតឱ្យអ៊ុយក្រែនវាយប្រហារជ្រៅទៅក្នុងទឹកដីរុស្ស៊ី ដោយប្រើប្រាស់មីស៊ីលដែលផ្គត់ផ្គង់ដោយប្រទេសលោកខាងលិចនោះ ទីក្រុងមូស្គូនឹងចាត់ទុកវាជាការកើនឡើងដ៏សំខាន់មួយ។
កាលពីថ្ងៃទី១២ ខែកញ្ញា លោកពូទីនបាននិយាយថា ការយល់ព្រមរបស់ប្រទេសលោកខាងលិចសម្រាប់ជំហានបែបនេះនឹងមានន័យថា “ការចូលរួមដោយផ្ទាល់ពីប្រទេសសមាជិកណាតូ សហរដ្ឋអាមេរិក និងបណ្តាប្រទេសតំបន់អ៊ឺរ៉ុបក្នុងសង្គ្រាមនៅអ៊ុយក្រែន” ពីព្រោះហេដ្ឋារចនាសម្ព័ន្ធយោធា និងបុគ្គលិករបស់ណាតូនឹងត្រូវចូលរួមក្នុងការកំណត់គោលដៅ និងការបាញ់កាំជ្រួច។
