ខេត្តព្រះវិហារ៖ នៅថ្ងៃចន្ទ ១៣រោច ខែភទ្របទ ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី៣០ ខែ កញ្ញា ឆ្នាំ២០២៤នេះ លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្ត បានដឹកនាំលោក លោកស្រីស្នងការរង និងមន្ត្រីក្រោមឱវាទចំណុះអោយស្នងការដ្ឋាននគរបាលខេត្ត បានចូលរួមកាន់បិណ្ឌវេនទី ១៣ នៅវត្តពោធិ៍សិលារាម (ហៅវត្តគីឡូលេខ៨) ស្ថិតនៅក្នុងភូមិឯកភាព សង្កាត់ប៉ាលហាល ក្រុងព្រះវិហារ ខេត្តព្រះវិហារ ។
ក្នុងឱកាសនោះដែរ ថ្នាក់ដឹកនាំ និងមន្ត្រីក្រោមឱវាទក៏បានអញ្ជើញរាប់បាទ និងវេរចង្ហាន់បិណ្ឌបាត្រ ព្រមទាំងទេយ្យទាន ប្រគេនដល់ព្រះសង្ឃបង្សុកូល ដើម្បីឧទ្ទិសនូវកុសលផលបុណ្យដែលបានចូលរួមគ្នាកសាងនៅថ្ងៃនេះសូម ជូនចំពោះបុព្វការីជន វីរៈជន និងញាតិការ ទាំង៧សន្តាន ដែលបានចែកឋានទៅកាន់លោកខាងមុខ សូមបានទទួល នូវមគ្គផលកុសលផលបុណ្យនេះ និងបួងសួងដល់ដួងវិញ្ញាណក្ខន្ធអស់លោក ទាំងអស់បានឈោងឆាប់កំណើត ទៅកាន់ទីឋានបរមសុខ ។
បច្ច័យ និងសម្ភារៈទេយ្យទាន ដែលប្រគេនក្នុងវត្តនៅពេលនោះរួមមាន៖ ស្លាដក់ចំនួន ១៣, ទឹកសុទ្ធ ០៩កេស ,ទឹកក្រូច ០៦កេស ,មី ០៨កេស, អង្ករ ០២បេរ(១០០គីឡូក្រាម) និងព្រមទាំងបានប្រគេនបច្ច័យសរុបចំនួន ៤,៨០០,០០០៛ (បួនលានប៉ែតសិបម៉ឺនរៀលគត់) សម្រាប់ទំនុកបម្រុងដល់ព្រះសង្ឃដែលកំពុងគង់ចាំព្រះវស្សា និងដើម្បីចាត់ចែងប្រើប្រាស់ក្នុងការកសាងសមិទ្ធផលនានាក្នុងវត្តផងដែរ៕
