ខេត្តមណ្ឌលគិរី ៖ នៅព្រឹកថ្ងៃពុធ ២រោច ខែស្រាពណ៍ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២១ ខែសីហា ឆ្នាំ២០២៤ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានដាក់ពង្រាយកងកម្លាំងនៅតាមគោលដៅចំណុចសំខាន់ៗ នៅតាមដងផ្លូវជាតិលេខ៧៦.A ចាប់ពីព្រំប្រទល់ ស្រុកស្នួល ខេត្តក្រចេះ រហូតដល់តាមបណ្តាស្រុកចំនួន ៣ រហូតដល់ក្រុងសែនមនោរម្យ ខេត្តមណ្ឌលគិរី និងនៅតាមបណ្តាប៉ុស្តិ៍ច្រកទ្វារទ្វេភាគី ទាំងបីដើម្បីការពារ សន្តិសុខ សណ្តាប់ធ្នាប់ និងសុវត្ថិភាពជូនដល់ព្រះអង្គធម្មវនវាសី ច័ន្ទ មុនី ដែលព្រះអង្គនិមន្តទស្សនកិច្ច នៅតាមប៉ុស្តិ៍ច្រកទ្វារភាគីទាំង០៣ ដែលស្ថិតនៅតាមខ្សែបន្ទាត់ព្រំដែនក្នុងខេត្តមណ្ឌលគិរី។
ការនិមន្តមកទស្សនកិច្ចនៅតាមខ្សែបន្ទាត់ព្រំដែន មានការអញ្ជើញចូលរួមអមដំណើរដោយ ឯកឧត្តម ថង សាវុន អភិបាល នៃគណៈអភិបាលខេត្តមណ្ឌលគិរី ព្រមទាំងឯកឧត្តមប្រធានក្រុមប្រឹក្សាខេត្ត និងកម្លាំងប្រដាប់អាវុធទាំងបី និងមន្ត្រីរដ្ឋបាលសាលាខេត្ត ព្រមទាំងលោកប្រធាន-អនុប្រធាន មន្ទីរពាក់ព័ន្ធនានាជុំវិញខេត្ត លោកនាយប៉ុស្តិ៍ទ្វេភាគីច្រកទ្វារព្រំដែនគោកទាំង០៣ និងប្រជាពលរដ្ឋដែលរស់នៅតាមស្រុកទាំង០៣ ដែលនៅតាមខ្សែបន្ទាត់ព្រំដែន និងប្រជាពលរដ្ឋដែលនៅក្នុងក្រុងសែនមនោរម្យ ខេត្តមណ្ឌលគិរី ដែលកំពុងតែរងចាំទទួលការនិមន្តរបស់ព្រះធម្មវនវាសី ចន្ទ មុនី និមន្តទស្សនកិច្ចនៅតាមខ្សែបន្ទាត់ព្រំដែន ខេត្តមណ្ឌលគិរី។
សូមបញ្ជាក់ផងដែរថា ៖ នៅវេលាម៉ោង៩ និង៣០នាទី បានរងចាំទទួលព្រះអង្គនៅព្រំទល់ខេត្តមណ្ឌលគិរី និងខេត្តក្រចេះ រួចបន្តដំណើរឆ្ពោះទៅកាន់ច្រកទ្វារព្រំដែនឡាប៉ាខេ ស្រុកកែវសីមា រួចនិមន្តទស្សនកិច្ចបង្គោលព្រំដែនលេខ ៦៥(១) ក្នុងតំបន់ច្រកទ្វារព្រំដែនឡាប៉ាខេ ក្នុងស្រុកកែវសីមា និងផ្ដល់ឱវាទដល់ពុទ្ធបរិស័ទរហូតដល់ម៉ោង១១ និង៣០នាទី រហូតម៉ោង១៥ និង០០នាទី ដល់ម៉ោង១៧ និង០០នាទី ព្រះអង្គបានបន្តដំណើរនិមន្តចេញទៅទស្សនកិច្ចច្រកទ្វារព្រំដែនណាំលៀស្រុកពេជ្រដា ទស្សនកិច្ចបង្គោលលេខ ៤៩,៥(១) និងផ្តល់ឱវាទដល់ប្រជាពុទ្ធបរិស័ទ រហូតដល់ម៉ោង១៥ និង០០នាទី ដល់១៧ និង៣០នាទី ព្រះអង្គបាននិមន្តទស្សនកិច្ចនៅប៉ុស្តិ៍ច្រកទ្វារភាគីដាក់ដាំ រួចបានបន្តដំណើរនិមន្តមកដល់ទីរួមខេត្តមណ្ឌលគិរី និងគង់សឹងនៅវត្តសែននោរម្យខេត្តមណ្ឌលគិរី រហូតដល់ម៉ោង១៧ និង៣០នាទី ដល់ម៉ោង ១៨និង៣០នាទី ព្រះអង្គបានសម្តែងធម្មទេសនានៅវត្តសែនមនោរម្យ ខេត្តមណ្ឌលគិរី៕
