WASHINGTON, Sept 25 (Reuters) – យោងតាមសេចក្តីថ្លែងការណ៍រួមដែលបានចេញផ្សាយដោយសេតវិមានកាលពីល្ងាចថ្ងៃពុធបានឱ្យដឹងថា សហរដ្ឋអាមេរិក បារាំង និងសម្ព័ន្ធមិត្តមួយចំនួនបានអំពាវនាវឱ្យមានបទឈប់បាញ់រយៈពេល ២១ថ្ងៃជាបន្ទាន់ នៅតំបន់ព្រំដែនអ៊ីស្រាអែល និងលីបង់ ហើយក៏បង្ហាញពីការគាំទ្រចំពោះបទឈប់បាញ់នៅតំបន់ហ្គាហ្សា។
សេចក្តីថ្លែងការណ៍រួមបាននិយាយថា “ស្ថានភាពរវាងលីបង់ និងអ៊ីស្រាអែល ចាប់តាំងពីថ្ងៃទី០៨ ខែតុលា ឆ្នាំ២០២៣ គឺពិបាកនឹងទទួលយក និងបង្ហាញពីការកើនឡើងនៃហានិភ័យដែលកាន់តែទូលំទូលាយនៅក្នុងតំបន់”។
សេចក្តីថ្ងែងការណ៍បានបន្ថែមថា “ដូច្នេះយើងអំពាវនាវឱ្យមានបទឈប់បាញ់ចំនួន ២១ថ្ងៃ ជាបន្ទាន់នៅទូទាំងតំបន់ព្រំដែនអ៊ីស្រាអែល និងលីបង់ ដើម្បីផ្តល់ឱកាសសម្រាប់ដំណោះស្រាយការទូត”។
សេចក្តីថ្លែងការណ៍នេះធ្វើឡើងដោយសហរដ្ឋអាមេរិក បារាំង សហភាពអឺរ៉ុប អាល្លឺម៉ង់ អារ៉ាប៊ីសាអូឌីត កាតា និងអេមីរ៉ាតអារ៉ាប់រួម និងប្រទេសដៃគូមួយចំនួនទៀត ដោយបានអំពាវនាវឲ្យរដ្ឋាភិបាលអ៊ីស្រាអែល និងលីបង់គាំទ្របទឈប់បាញ់បណ្ដោះអាសន្នជាបន្ទាន់៕
